فيزة الشنجن او الاتحاد الاوربي كامل وكيف تحصل عليها

اهم النصائح للحصول علي فيزة  الشنجن من مصر 

فيزة الشنجن من مصر

حلم السفر لأوروبا

حلم يراود الكثير منا لكن تبقي اسطورة الحصول علي فيزا الشنجن هي العائق الاكبر وده خلي اشاعات كتييير تطلع زي مثلا لازم تكون ملياردير او رجل اعمال  او صاحب شركات و معاك فلوس كتير في البنك وغيره وغيره وغيره  عشان تاخد الفيزا  , او مثلا مستحيل تاخدها لو باسبورك ابيض او لو اترفضت في سفارة من سفارات الشنجن مينفعش تقدم قبل 6 شهور و ووووو إلي اخره من الاشاعات 

لذالك هنتكلم هنا عن بعض النصائح و كيفية تحصل علي فيزا الشنجن وباسهل الطرق

اول حاجه خلينا نفهم يعني ايه فيزا الشنجن :-

فيزا الشنجن هي فيزا تتيح لينا التنقل بحرية تامة  بين 26 دولة اوروبية تقع داخل نطاق الشنجن , مش كده و بس , لو معاك فيزا شنجن ساريه تقدر تدخل دول الاتحاد الاوروبي خارج الشنجن زي كرواتيا , صربيا  ودول تانيه كتير.

تاني سؤال هو

اي هي دول الشينجن هما 26 دوله هما :-  ( النمسا – بلجيكا – التشيك – الدنمارك – استونيا – فنلندا – فرنسا – المانيا – اليونان – هنغاريا – ايسلندا – ايطاليا – لاتفيا – ليتوانيا – لوكسمبورج – مالطا – هولندا – النرويج – بولندا – البرتغال -  سلوفاكيا – سلوفينيا – اسبانيا – السويد – سويسرا – ليختنشتاين )

وثالث سؤال  انواع فيز الشينجن:-

فيزة A  :-  تسمح للمسافر بالعبور في المطارات الدّوليّة دون الخروج إلى أيّ منطقة من مناطق الشنجن (على المسافرين من العراق والصومال التّقديم لهذا النّوع من التّأشيرات عند العبور في مطارات مناطق الشنجن) تأشيرة ترانزيت .

 فيزة B :-  تسمح للمسافر بالتّنقّل في مناطق الشنجن لحدّ أقصاه خمسة أيّام في السيارة أو القطار أو المطارات للسّفر إلى منطقة خارج مناطق الشنجن. تأشيرة إقامة قصيرة.

فيزة C :-   تسمح للمسافر بالمكوث في منطقة الشنجن بهدف السّياحة، والعائلة والعمل إلى حدّ أقصاه 90 يومًا خلال 180 يومًا. تأشيرة تداول C تسمح للمسافر بالمكوث لمدّة أقصاها سنة بهدف العمل، أو بدعوة خاصّة من بلدان الشنجن. تأشيرة إقامة طويلة.

فيزة D :-    تسمح للمسافر بالمكوث لأكثر من ثلاثة أشهر بهدف الدّراسة، أو العمل أو التّقاعد. كما ننوه الى أنه يمكن الحصول على فيزا شنجن جماعية، حيث يكون ذلك اذا كان عدد الأفراد بين خمسة وخمسين شخصا، ويجب عليهم الدخول والخروج والتحرك مع بعض، وتعتبر هذه الفيزا في كثير من الأحيان خاصة بالفرق الرياضية أو المجموعات السياحية.

بعد كده  ايه هيا الاوراق المطلوبة :-

1 -  باسبور ساري ( مش مسستخرج من 10 ) سنين المهم في البسبور انه يكون ساري بعد مدة  الفيزة ب 3 شهور

2 -  استمارى بتنزلها من موقع السفارة  المراد التقديم ليها وبتملاها وبتوقع في الاماكن المخصصه للتوقيع

3 - 2 صور شخصية بالمقاس المطلوب في السفارة وعادت اغلب السفارات بيكون 4*6

4 – كشف حساب بنكي 3 او 6 شهور حسب السفارة بس يعتبر اغلب السفارات بتكون  6 شهور

5 -  حجز طياران وفندق مؤاكد

(الحجز المؤاكد هو انك تكون مكلم فندق معين بحيث لما تروح هناك يكون ليك سكن او مكان اقامة

والحجز المؤاكد اسهل منه مفيش و غير كده انه ببلاش وفيه منه بفلوس رمزيه تاكيد فقط والفندق وشركة اطيران بترسل لك  ورقة بانك هتحجز عندهم  )

ولو عاوز تعرف ازاي تعمل حجز مؤاكد طيران وفندق هتلاقيه في اليوتيوب  اكتب حجز طيران وفندق مؤاكد هتلاقي فيديوهات كتير اختار اللي يعجبك 

6 -  جواب   HR (توضح فيه تاريخ   بداية الشغل  والمسمي الوظيفي  و المرتب)     

لو رجل اعمال او تاجر (سجل تجاري وبطاقة ضريبية)

7-  وثيقة تامين بمدة سفرك وبعض السفارات بتطلب اسبوعين او اكثر زيادة علي وثيقة التامين . الوثيقة دي ثمنها 100 – 200 جنيه حسب المدة وحسب المكان وممكن تجيبها من التامينات او من اي شركة تامين

8 – لو اول مره تسافر اوربا بتجيب شهادة تحركات من مجمع التحرير

9 -  دفع رسوم التقديم للسفارة وبتكون 60 يورو

كل الكلام اللي قلناه ده الكل عارفه  نبدأ بقى نتكلم عن أهم اسباب الرفض و ازاي نتغلب عليه

اولاً كلامي ده موجه فقط للناس اللي عايزه فعلا تسافر سياحه تتفسح مش اللي رايحه عشان تكسر فيزا او تدخل بطريقة غير مشروعه وبدال كسر الفيزة فيه بعض السفارات بتسمحلك انك تحول الفيزة لاقامة او عمل بس ده بعد ما بتروح هناك اما الشروط دي فهيا لكل اللي عاوزين يستخرجو فيزة سياحه

اسباب الرفض

* اول سبب وأشهر سبب للرفض انك متقنعش القنصل في الانترفيو او في ورقك لو سفاره مفيهاش انترفيو , الناس فاكره انك لو معاك 100 ألف في البنك و ورقك كامل هتاخد الفيزا بسهولة , مش ده اللي هيديك الفيزا , القنصل عايز يتأكد انك مسافر للسبب اللي مقدم ليه وهو السياحه , عشان كده سيبك من كلام الناس اللي بتقولك خش علي tripadvisor وشوف الاماكن المشهوره إيه وخلاص , لأ  , انت المفروض تذاكر البلد دي, اعرف فعلا انت رايح هتشوف ايه , هتركب مواصلات ايه من الفندق للاماكن دي , هتسافر ازاي بين مدينه و التانيه , حسس القنصل في الانترفيو انك فعلا عارف هتعمل ايه , لو مفيش انترفيو اكتب خطاب للقنصل فيه تحركاتك بالتفصيل , إدي انطباع انك فعلا رايح تتفسح مش رايح للمجهول.

* تاني سبب ان معندكش كشف حساب او كشف حسابك فيه مشكله , اولا لو معندكش كشف حساب ابدا افتح حساب من دلوقتي عشان مينفعش تقدم من غير كشف حساب , تاني حاجه اسطورة ان يكون معاك عشرين او 30 او 70 الف جنيه كل الكلام ده غلط , اهم حاجه يكون فيه حركه علي حسابك سحب و ايداع , دي اهم من الرصيد , ودي سهلة اعمل حركات كتير علي حسابك , تاني حاجه كل دولة من دول الشنجن طالبه حد ادني في حسابك , مثلا سفارة اسبانيا طالبه يكون حد ادني 64 يوروعن كل يوم هتقضيه هناك بحد ادني 577 يورو في حسابك , يعني اقل من 10000 , اليونان طالبه 50 يورو عن كل يوم , و هكذا , يعني 10 الاف - 15 الف في حساب يكون عليه حركات سحب و ايداع حلو أوي , و كمان لو عندك كريدت كارد صور وجهه و قدم الصوره مع اخر ستيتمنت له.

* تالت سبب هو ان باسبورك أبيض و مسافرتش اي دول قبل كده , طبعا يُفضل انك تحاول تسافر الدول السهلة في الاول زي تركيا , ماليزيا , تايلاند, جورجيا ...الخ , بس طبعا مش مستحيل تاخد الشنجن اول فيزا لو اتغلبت علي السببين اللي فوق , بس فيه حركة حلوة تخلي شكل باسبورك احسن لو فاضي , فرضا انك عايز تسافر دولة من دول الشنجن , من حسن حظك ان الطيران التركي بيطير لمعظم الدول الاوروبية , قدم الاول علي فيزا تركيا , و اعمل برنامج سياحي يومين تلاته في تركيا قبل السفر للشنجن , و قدم حجوزات تركيا دي مع ورقك لسفارة دولة الشنجن بحيث تبين انك هتقعد يومين في تركيا و بعدين مثلا اسبوع في الدولة دي و هيشوفوا الفيزا اللي خدتها و حجوزاتك و هيقتنعوا فعلا انك مسافر.

* رابع سبب حجز الفندق غير موكد , احيانا السفارات بتتصل بالفنادق تتأكد من الحجز , متحاولش تلغي حجز الفندق قبل ما الفيزا تطلع اطلاقا لان ده هيؤدي لرفض فيزتك.

* خامس سبب ان ملكش وظيفة , دي اكتر حاجه هتخوف السفارات منك , لأن وجود وظيفة أو بتدرس في جامعة = فيه ارتباط ببلدك و مش هتهرب , عشان كده تجنب انك تقدم و انت ملكش وظيفة , او حاول علي قد ما تقدر اي حد معرفه يعملك جواب اتش ار في شركته , و ممكن بحوالي 5000 جنيه و عقد ايجار تقدر تاسس شركة و يتكتب في باسبورك صاحب شركة كذا , الطرق كتير اهم حاجه متقدمش و انت ملكش وظيفة , نيجي بقي للناس اللي عندها وظيفة و هتقدم HR , حاول تقدم و يكون عدي عليك اكتر من سنة في شغلك , دي نقطة قوه , تاني حاجه حاول دايما الجملة دي تكون مكتوبة في ال HR " و نحن علي علم بأن السيد / .... سيسافر الي دولة كذا في الفتره من كذا لكذا بغرض السياحة و انه سيعود ليباشر عمله في الشركة من يوم كذا " , الجملة دي بتبين ان شغلك عارف انك مسافر و مديك اجازة في الوقت ده , و دي نقطة قوة في صالحك قدام أي سفارة.

ودي بأختصار اسباب لقدر الله الرفض .

اسئلة كتير بخصوص فرص الحصول على فيزا شنجن للعراقيين والسوريين. بسبب الأحداث الاخيره في سوريا والعراق فرصة الحصول على فيزا شنغن 2016 صعبة جداً، والإجراءات منذ العام 2011 بتزيد صعوبه على مواطني الدولتين، عشان السفارات عارفه أن الغرض من الفيزا هو اللجوء، واللي بيدوله  الفيزا هما رجال الأعمال أو الأشخاص اللي يمتلكون حسابات بنكية كبيرة.

تنبيه بسيط بس لفئة معينة !!!

بعد كل التوضيحات في المقال ده،بشوف تعليقات غريبة من الناس، زي اللي بيسأل عن أسهل طريقة للحصول على فيزا شنغن !!! وحقيقة بستغرب من اللي بيسأل السؤال ده كأني كل اللي اتكلمت فيه مش واضح، وأن في طرق سهلة للحصول على التأشيرة بداريها عليه.

دا كل اللي عندي للحصول على فيزا شنغن – Schengen Visaواللي يلاقي نقطه موضحتهاش، أو عاوز يستعلم عن أى حاجه،  انا تحت امرك فأي حاجه

تحديثات حول فيزا شنغن لعام 2017 

أصدر الاتحاد الأوروبي، قرار بينص على تشديد البند الخاص بالدخول اجبارياً لأول دولة يحصل الشخص على تأشيرة شنغن من سفارتها، فمثلاً اذا حصل الشخص على شنغن المانيا فلا يمكنه الدخول إلى لأي دولة قبل الدخول إلى المانيا أولاً، علماً أن هذا القرار يطبق على من يدخل دول شنغن لأول مرة،